A EMPATÍA NA ORIENTACIÓN LABORAL

“As tres cuartas partes das miserias e malos entendidos no mundo rematarían se as persoas se puxesen nos zapatos dos seus adversarios e entendesen o seu punto de vista”

(Mahatma Gandhi)

Dentro dos condicionantes da comunicación, atopámonos elementos que, correctamente utilizados, poden marcar a diferenza entre unha comunicación eficaz e unha comunicación deficiente. Estes elementos son : A empatía, A escoita activa e a asertividade.

Falaremos nesta ocasión da empatía, que é, distinción coa simpatía, como fomentala no noso traballo como orientadores/as laborais e vantaxes e desvantaxes que nos ofrece.

QUE É TER EMPATÍA

A empatía é a capacidade persoal para conectar cos sentimentos e as emocións dos demais. Trátase de comprender os seus argumentos e os seus puntos de vista. Non se trata de estar de acordo en todo coa outra persoa nin deixar a propia identidade pola da persoa, senón de pórse nos zapatos da outra vendo a súa perspectiva da situación e todo o que esta lle xera tanto emocional como persoalmente.

EMPATÍA

Para que se poida dar a empatía, os límites do propio eu deben de ser flexibles e receptivos.

A empatía ten dous compoñentes:

Ø Empatía afectiva: ser capaz de sentir o que outras persoas están sentindo.

Ø Empatía cognitiva: ser capaz de sentir o que outras persoas están pensando.

A empatía permítenos coñecer e comprender mellor ás persoas, a través do trato cotiá obtendo unha maior colaboración e entendemento en todos os escenarios da nosa contorna.

O valor da empatía desenvolve en nós a capacidade de motivar e canalizar positivamente ás persoas.

DIFERENCIAS ENTRE EMPATÍA E SIMPATÍA

A simpatía é un proceso que nos permite sentir os mesmos estados emocionais que senten os demais, comprendámolos ou non. Con todo, a simpatía é un proceso puramente emocional, que ten coa empatía unha relación indirecta pero con diferenzas substanciais.

Coa simpatía podemos achegarnos aos sentimentos da persoa receptora e chegar a pórnos ao seu favor, pero sen necesidade de comprendelos. A empatía é algo diferente porque nos implicamos emocionalmente, e por iso entendemos os sentimentos dos demais, porque os sentimos como propios ademais de comprendelos coas nosas mentes. Pero ademais, e fundamentalmente, a empatía inclúe a comprensión das perspectivas, pensamentos, desexos e crenzas alleos.

Por dicilo dun xeito literario, sentímolos cos nosos corazóns e comprendémolos coa nosa mente.

A simpatía é un pobre substituto da empatía.

COMO FOMENTAR A EMPATÍA

Hai algúns elementos que poden axudarnos a desenvolver a empatía no desempeño das funcións como orientador ou orientadora laboral. Entre eles:

Ø Sorriso: o sorriso xera un ambiente de confianza e cordialidade.

Ø A serenidade: mostrar serenidade e calma fai que a persoa interlocutora se sinta tranquila e o ambiente sexa máis relaxado.

Ø A escoita activa: escoitar con atención e entender o que a outra persoa nos di para poder establecer un feedback. Non se trata de oír, senón de escoitar e entender.

Ø Evitar demostrar presa: aburrimento, cansazo, dar respostas tallantes ou distraerte noutras cousas; ademais de ser unha falta de respecto, evitándoas lógrase autodominio e demóstrase interese polas persoas.

Ø Non prexulgar: non se debe facer un xuízo prematuro das persoas porque fai que cambie a disposición de cara a elas.

Ø Entenderse a un mesmo: Para entender as demais persoas primeiro debemos entendernos a nós mesmos.

Ø Animar: non se debe esquecer infundir ánimo con palabras, unha palmada no ombreiro ou un xesto amable, sobre todo se a persoa ten problemas.

VANTAXES E DESVANTAXES DA EMPATÍA NA ORIENTACIÓN LABORAL

Aínda que existen algunhas desvantaxes, son moitos e moi bos os beneficios das persoas orientadoras con capacidade de empatizar.

As persoas empáticas están moito máis adaptadas aos sutís sinais sociais que indican o que outros necesitan ou queren, son colaborativas, dialogantes, adáptanse con facilidade aos cambios e evitan os prexuízos e etiquetas nos seus usuarios e usuarias.

As persoas empáticas, séntense mellor consigo mesmo, fomentan o desenvolvemento emocional, conectan rapidamente cos demais, facilitando que as relacións interpersoais sexan mais cómodas e mais sinxelas.

Empatizar é ver as cousas dende a perspectiva doutra persoa, non buscar solucións.

Pola contra, ser unha persoa altamente empática tamén, pode ter as súas desvantaxes. Unha persoa empática é moi consciente de todo o que a rodea, percibindo situacións que outras persoas non perciben. Esas situacións son, a miúdo, tristes e dolorosas obrigando á persoa a vivir emocións e a experimentar sentimentos difíciles de asumir.

Moitas veces, as persoas cun nivel de empatía alta asumen as emocións das persoas que as rodean ata o punto de antepor a asunción dos sentimentos das demais persoas aos seus propios, ocasionándolles problemas persoais de difícil solución.

CONCLUSIÓNS

Como ben indica Daniel Goleman, de todas as competencias da intelixencia emocional, a empatía é a fundamental, para comprender e apreciar os sentimentos das demais persoas. É a dimensión base para todas as competencias sociais que son importantes no ambiente laboral.

Vivir o valor da empatía é algo sinxelo se nos detemos a pensar un pouco nos demais e aprendéramos a actuar favorablemente en todas as circunstancias. As persoas empáticas saben escoitar, son tolerantes, sensibles e brindan axuda baseada na comprensión das necesidades e os sentimentos dos demais.

Por este motivo, podemos concluír que a empatía é un valor indispensable en todos os aspectos da nosa vida e, sen el, sería moi difícil enriquecer as relacións interpersoais. Quen se preocupa por vivir este valor, cultiva simultaneamente entre outros: confianza, amizade, comprensión, xenerosidade, respecto e comunicación. .

Para rematar, deixo por aquí, un pequeno vídeo de Elsa Punset que aborda a empatía e o altruísmo como motores fundamentais na historia evolutiva da nosa especie. Espero que sexa do voso interese.

"Empatía y altruismo"